Ruurdtsjes Kidelkollum: Kontrasten yn Boerum

Ruurdtsjes Kidelkollum

Hertlik wolkom by dizze Fryske blogger.
Jahaa, der wurdt wat ôfblogge troch dit frommis. Dat wie de bedoeling eins net, dit soe in side wurde mei heechsteande poëzy (fan mysels, fansels), en oare nijsgjirrige literêre produkten. Mar wêr draait it op út? Jawis, op babbelegûchjes oer Boerum, bern dy't puberje en bargebiterij. Oft dat slim is? Dat meie jo bepale.
Ik skriuw.

woensdag, maart 23, 2011

Kontrasten yn Boerum

Literêr Sirkwy

Wêr: Herfoarme tsjerke Boerum, middenyn it doarp
Wannear: 3 april 2011, fan 15.00 – 17.00 oere
Entree: € 4,00
Skoft: kofje/fris om 16.00 oere hinne

Boerum leit op de râne fan trije taalgebieten, en dy talen wol it Sirkwy graach ris oan bod komme litte. Der sille fersen en ferhalen yn it Frysk, Westerkwartiersk en yn it Boerums te hearren wêze. De tema's binne diskear it kontrast (yn talen, bygelyks) en rjocht-ûnrjocht. Foar de tsjerke fan Boerum leit noch hieltyd de rjochterstien, dêr't eartiids rjocht sprutsen waard. It muzikale part komt fan it Walke Hofstee Brass Ensemble, dat foarme wurdt troch pleatslike spilers. Ik ferwachtsje dat it wer in middei wurdt sa't Boerum dat wend is; mei in soad folk dat der nocht oan hat.